Col 4 | ASO | STEP | Ido' gonolo' veti gizebo ve'ine lingine Okulumoku' nene lengito' gizebo vetine ma neine' nenaze. A'minemu' nene gili mini lengi' gonou' vetine nene monovo hehe lo mineline' lisihekovo' nene i-ngidisa minilo.

Colossians 4

1 Ido' gonolo' veti gizebo ve'ine lingine Okulumoku' nene lengito' gizebo vetine ma neine' nenaze. A'minemu' nene gili mini lengi' gonou' vetine nene monovo hehe lo mineline' lisihekovo' nene i-ngidisa minilo.

Igi Mili Minilizani' Monovo Gohi Mamu' Paulo' Ga'ine Do Line' Gamazi

2 Ido' O'mosola li minilizani' nene hulami laakovo' igi minilo. Ido' ne'mini O'mosola li minilizangu' nene lutine okise ongamivoo gilingili igi O'moso nene isaa' neve li-di minilo. 3 Ido' Kilisito' gamazi've gomu' suno' minine' lo soto' ogo lo-ngemeloningumu' nene O'moso'mo akahe si'ze-ledaavo naza lolodo' o neido' do molo lolongumu' neni' nene a'mine gamazi lovo ngolo' lovo' ogo lo-ngemelive lii lingine a'mine O'mosola li minilizangu' nene lelikumukisi lilo. Naza nalato' ve nouvoni' nene a'mine Kilisito' gamazi've lo soto' oga' uvongumu' nene nouve. 5 Ido' lingine nene gopo moni minamii evene' ado' Izesu' evenele lili' ami heta minave nene nanite' di-ngidilizahe a'minemu' nene gatine gili nge li mini monovo laminekovo' i-ngidi evene' hize ele' i-ngidiliza gonotine lamine' soto' iline' nene mo diivo' minilo. 6 Ido' gamazitine lilizani' nene gamazi unuvo huhu lo mino melele' o mineline' gamazivo' lilo. Ne'mine igi minilizaani' nene monokumu' ma longo' i-lingidilizave hamo hamo' nene di velepe' izi li-ngimiliza gamazimu' nene gili hehe li minisa minilizave.

Paulo' Gamazi Lo Osu' Nolo Geke' Lo-ngidine' Gamazi

7 Ido' nenita soto' o'mo novine' initekumu' gamazi've muki' nene Tikiko' lo-lengemeleseive. Aza nene Kilisito' evenele leli' zuho Guvetesi ve'mi gelekele' izipe've lisihe' lamine' lelikisi maka' gono daa' ive neivo lu'ne emaa' nouve minive 8 ne'mo leli' gamazi nene lo-lengemo muludingu' do lamine' ilive lo imiselekuvo lengita nesene novive. 9 Ido' lengikuti' ve Onesimo' nene leze zuho peleseve' izamaa' ive lute eme nonive minive aza nene ezesi maka' nivasive. Ingine nene mela minine' gamazi muki' nene li-lingimilisasive.

10 Nenikisi maka' nalato' nosive Alisitako' ne'mo nene longopo'ni nolive. Ido' Banabasi' oholoho Maleko' nesi nene longopo'ni nolive. Ezemu' i-dilizani' gamazi nene mo lengita hulo nouvo mo gili nizani' ma neive. Lengita naavo ma nene ele'mize lamine' ilo. 11 Ido' ve ma gulive Izesu' ve lo minine' ado' gulive've gohi ma Zusito' ve li li-daa' ave neesi nene longopo'ni nolive. Zuda ve minanguti' nene a'mine luve metevo' nene nenikisi maka' O'moso'mo gizebo o-ledelingumu' gono daa' unive minii a'mine nete nene hize ele' gehepeve i-nidave. 12 Ido' lengikuti' minive mino Izesu' Kilisito' gonolo' ve minive Epahala' nesi nene longopo'ni nolive. Aza lengikumu' nene gamene gamene O'mosola zege' zege' ogo laa' neive. Ee, lingine monoku' lodive igi O'moso'mo lulou' giline' gamazi muki' nene gili hehe li a'mido' e'meti osu' lilizave losa nene O'mosola laa' neive. 13 Ee, naza eze monovo nene mo gele noosa a'minemu' nene ti' lo noluve: Aza neve nene lengikumukisi ido' Izesu' evenele Laodikia ebeku' minavemukisi ido' Hielapoli ebeku' minavemukisi nene ge'nebe gono goloso amuzo molosa do minaa' neive. 14 Ido' longopo'ni gohi ma nilasine' nene lute eme nonive tota ve Luka' nesi ido' ve ma Dema' nesi nene nilasive. 15 Ido' laza leze zuho Laodikia ebeku' mulise milaa' naavesi ido' Nimiha'nisi ido' mono' aleve eze numu'veu' mulise milaa' naavesi nene ngopo'ni noluze. Li-ngimilo. 16 Ido' luhuvo nite' meve nene gati li-lingimikevo ma nene Laodikia ebeku' mulise milaa' naangu' nesi nene gatilizangisi huli-ngidilizave. Ido' Laodikia ebeku' di nizani' luhuvo nite' nene lingine di igi a'minesi nene gatilo. 17 Ido' Alakipo'ni nene ti' li li-imilo: Gaza Guvelesi ve'mo gimine' gono nene hulamo mo do pelelove lo gele minosa dalosane.

18 Luhuvo nite' gizi-nidaveti a'ninguti' luhuvo gizaa' inite' nene doosa neni' Paulo' nene longopo'ni lo neni' a'nedunu' nogizuve. Nemu' nene lingine nalato' nouvongumu' nene gatine molalize. A'minemu' nene gili minilo. O'moso'mi nasahili've ne'mo nene lengita mine molo minivoo.